肯捱的女人

今天在FB看到有人share了以下高登式潮文, 哈, 可和我上一篇的<賢人>呼應一下.

《男人一生，只為尋覓一個肯同自己挨麥記嘅女人》

是咁的，身邊啲朋友成日問我有咩擇偶條件，巴巴閉閉咁分享佢地嘅心得。

話咩要有劉心悠嘅面孔、法拉嘅笑容、雷凱欣嘅身材、何家淑女嘅後台、Angela Monkey嘅整容醫生。

我多數就一句車埋去：「咁個條女會唔會陪你去食麥記先？」

個宅男肥仔拎住個巨無霸，臉容扭曲到好似畢加索啲名畫咁，生命去到一個非常危險嘅階段。聽到依個問題，佢已經從最終幻想中解放出黎。
他已經死了。

唔想講都要坦白講，一個男人去到廿幾歲，拖住條女，「去邊食飯」依個問題仲難解拆過「南北韓危機」同「阿仙奴N年無冠」。

有時銀包就得個幾廿蚊，衰啲講句入星巴克買杯Latte扮下高尚，已經要行路返屋企。

隔離有個女伴，想食餐經濟啲嘅都要左諗右諗，
「譚仔呀！今日想食米線！」
「吓，好逼喎...」

「沙嗲王呀！都坐得舒服！」
「吓，要等勁耐喎...」

「不如食碗雲吞麵呀！寶貝你想減肥嘛！」
「吓，勁多阿叔阿伯喎...」

「食麥記」？你真係講都唔敢講！就算佢肯，你都唔好意思問。

試過同一位已成歷史塵埃嘅女朋友走入一間茶記。
喂唔差架喎其實！
地板立立令唔在講、餐牌全過膠，令你感受到法國西南部波爾多嘅浪漫迷情、加上圍繞身邊，三部LCD大電視，令你可以係2013年，觀賞亞視節目：「2010年亞洲小姐決賽」，個種係過去未來穿梭嘅快感令人縈繞夢域。
一個客飯配咕嚕肉，唔包餐飲都78蚊，絕對唔cheap！

只不過對面個女人就唔係咁諗啦，
聽到入茶記已經成個比達上身咁西口西面，
見到個餐牌直情變埋超級西面人。
大佬，你想做比達都睇下對面個個係唔係莊子啊！

又話唔乾淨、又話個位逼、又話電視機好嘈。

我心諗：「法拉利跑車啲位仲窄，你係咪唔坐先？成日落老籣啲 clubbing，都唔似好安靜下話，斷估你都唔會拎本雙城記去老籣呀，你邊有咁文藝呀？」
ok fine！我諗就凶狠，講就冇份...

最後佢講左一句：「Honestly，我覺得食餐飯每人三百零蚊好基本囉。」
我心諗：「安甩匙哩，你唔洗強調每人囉，你都冇找過數。係咪？」
我想即刻飛左佢。
但事實上佢即日已經飛左我。

悲劇。

我曾經以為女人都是這樣，我曾經想過做「一休和尚」算數。得閒有需要就扑下木魚，以此為樂。

估唔到有生之年仲搵到一個主動同我食麥記嘅女仔。

一個男人要同女朋友食麥記，為咗啲咩？
覺得麥記好好食？覺得麥趣飯好爆趣？覺得陳豪真係會拎住條寬頻線彈出黎請你飲杯「給不千奴」？

成年人唔好比咁多幻想自己啦，廿幾歲仔要拉個女朋友去食老麥只係因為四個字－「山窮水盡」。

講真，當個女仔提議食麥記嘅時候，我真係懷疑佢係到試探我。只要我話好，就會收取「你是好人」嘅好人卡。

但我見佢咁真心又一試無妨。
一坐低佢就問我食咩，就自己行左出去買。
我心諗「出事！」

係麥記兵法之中，只要你戰略得宜，一餐飯既價格要超越California Pizza絕對唔係難事。
一個散嗌嘅扭扭粉，掟個靚彎去隔離「麥café」整杯藍梅特飲，加件芝士餅。驀然回首order多客薯條走鹽，雞翼併盤當做例行，真係我慣了傷心，臨尾飄移外賣一個開心樂園餐，話要換禮物比細佬。成壇野已經一百幾廿蚊，仲要未買你個份。

只係說時遲、那時快，女朋友已經買咗返黎，佢最後要既只係廿一蚊既麥樂雞餐，無加大、無加三蚊變檸檬茶。
個一野已經眼濕濕，我想話比返錢佢，佢仲借啲意話遲下食好嘢先比我請返。
我好滾動，我終於流下男兒淚，個時仲要搭梗枱。

女朋友問我好地地做咩喊，我唯有話啲洋蔥澀眼，真係「一層一層一層 的剝開我的心」，但係我食梗魚柳包...

個一刻，我終於明白，咩叫感動。
踢場足球係 運動、
比賽攞獎係 激動、
BB出世係 作動、
上床攪野係 性衝動、
套都唔戴係 輕舉妄動、
長洲個個係 張保仔洞，

只有女朋友係你唔太惦嘅情況下，主動拉你去食麥記，仲要顧住你面子，唔令你難堪，掛住個笑樣拖住你隻手仔食薯條，個一下先叫感動。

劉心悠始終會老、法拉都有黑面嘅時候、雷凱欣會爆炸、何家淑女你又唔係陳X聰、Angela Monkey都開始同人撞樣啦！

男人一生，尋覓到一個肯同自己挨麥記嘅女人，三個字。

娶得過

肯捱麥記原來是好女人的標記, 我想又不需要太斟酌, 那只不過是肯捱窮的諭意, 卻不禁感嘆時代的轉變, 麥記已是低消費的食堂.  還記得我剛出來社會工作時, 人工只得一千二百元, 中午在茶餐廳買一個飯盒大概五元, 若到麥記, 要吃得飽, 一個芝士漢堡, 一杯飲品加一個朱古力新地要大概七至八元.  那時沒有微波爐, 沒有人帶會帶飯的, 一半人工給母親, 餘下一半自己用作交通、食用、衣裝和晚上進修的學費, 若一個不為神感冒要看醫生, 那個月清袋,  要慳錢的話, 不能常去麥記.  日漸人工增長, 可以間中吃得好一點, 不過, 若要吃平價餐, 麥記不是一個好選擇, 因為那時價廉物美的食品多的是.  那時的男生認為女朋友肯和自己吃魚蛋粉吃雲吞麵就已不得了,  時移世易,現在在銅鑼灣吃個雲吞麵餐要大概五十元. 以前區區都有些麵包舖, 想買個新鮮出爐的麵包走兩步就可以, 現在只得那些連鎖店, 難吃得很, 茶餐廳的水準也不敢恭維, 我怕再遲些時日, 再沒有小食肆可立足閙市, 多得地產霸權!   真替現今的年青人悲哀, 出外消遣, 貴不在話下, 最慘是沒選擇.

說回娶得過的女人, 我在想男生總希望女的肯捱, 但請問你自己有甚麼吸引肯捱的女生, 難道我是男人就成? 或是我鍾意妳, 妳就會鍾意我? 憑甚麼? 當你環境好一點時, 你又如何對待曾跟你捱的人?  又若當有魔女拋個媚眼, 給人掃一下背, 食個波餅, 撞下屁股時, 神魂出竅或即時抽水的反應和模樣太嘔心了吧,  叫人對你痴心? 是否妄想?  要人真心專一肯捱, 先問問自己是否同一路人才要求吧. 

深雪的《女神之翼：男和女看壞女人》中有說: 「男人心目中的壞女人，貪錢的，一定上榜。男人有錢無錢，都憎女人貪錢，只要女人表露出些少貪錢本性，男人就會覺得這個女人要不得，不是真心愛他......之不過，若然壞心眼的女人艷絕人寰，男人可能又會漠視她的壞，甚至會覺得她好刺激。」這個又似乎是常見的事實!

我想此潮文一定會出現在高登討論區, 應會引起很多回應, 於是上去看一看, 哈哈, 有些留言很有趣, 亦有道理.

http://forum5.hkgolden.com/view.aspx?type=LV&message=4447851&highlight_id=0&page=1

你搵個暗瘡肥婆唔打扮既豬扒實同你食嫁
問題係，你想同佢地食咩
又要人靚，又要人食M記
唔靚又睇唔上眼

-----------------------------------------------------------------

其實食平野有乜奇丫
依家講緊既係共患難
巴打唔好諗住你條女肯食老麥就好女
如果可以猛到張飯票下半世無憂，拍拖去饑饉三十都無所謂啦下話？
絲打都唔好諗住自己劣食開就自我感覺良好先得架
如果你條仔病到一段長時間返唔到工果陣你仲日日照顧佢陪佢粗茶淡飯甚至倒貼住佢先，果陣你再講“佢已經搵到喇”啦